அழகு - அருணா

விண்ணுக்கு விண்மீன் அழகு

வண்ண என் கண்ணுக்கு -

- அவளின் வடிவம் அழகு!

பாசத்திற்குப் பரந்தாமன் அழகு

நேசத்திற்கு என்னவளின்

பார்வையழகு!

பரிவுக்குப் பேகன் அழகு

கரிய என் கனிவுக்கு

அவளின் கனிவாய் அழகு!

திமிருக்குத் தில்லை வள்ளியம்மை அழகு

நிமிர்ந்த நன்னடத்தைக்கு

குமரியவளே அழகு!

சினத்திற்கு சீவகன் அழகு

இனத்திற்கு என்

இனியவள் அழகு!

கடவுள் நெறிக்கு காரைக்காலம்மையார் அழகு

கடந்துபோகும் நாட்களுக்கு

அவளது கடமை அழகு!

நட்புக்கு கர்ணன் அழகு

மட்கா என் காதலுக்கு

அவளது வைரநெஞ்சம் அழகு!

பெற்றோருக்குச் சிரவணன் அழகு

உற்றோரான எங்களுக்கு

அவளின் உறுதுணை அழகு!